Rektori Dema nderohet me titullin “Nderi i Qytetit”
Në një ceremoni solemne, rektori i Universitetit të Prishtinës “Hasan Prishtina”, prof.dr. Marjan Dema është nderuar me titullin “Nderi i Qytetit” i Komunës së Klinës.
Veprimtarinë e rektorit të UP-së, i pari i Klinës, z. Zenun Elezaj e quajti të devotshme, duke shtuar se e gjithë Klina është krenare me emrin e tij.
“Profesor, doktor Marjan Dema personifikon figurën e shquar të një pedagogu, shkencëtari, veprimtari dhe ardhetari të devotshëm. Andaj, ne bashkëqytetarët jemi të lumtur që ju kemi dhe krenar me emrin tuaj. Kontributi dhe të arriturat tuaja janë të veçanta dhe përputhen plotësisht me kohën kur Klinës dhe Kosovës në përgjithësi i duhet promovimi i këtyre vlerave”, tha Elezaj.
Gjersa kujtonte se çfarë ka bërë Klina për të, rektori Dema tha se është i lumtur që vendi prej nga vjen ia dha këtë titull.
“Ky nderim që Kuvendi Komunal ma bëri do të jetë një inspirim dhe obligim që atë dashuri dhe respekt që kam për këtë trevë, ta forcoj edhe më shumë. Titulli “Nderi i Qytetit” do të më shtyjë që të nderoj Klinën ngado që shkoj, e që të jem ambasador i kësaj komune kudo, duke e ndihmuar me tërë potencialin tim në të gjitha fushat e mundshme”, tha ai.
Në këtë ceremoni të pranishëm ishin kryetari i Kuvendit Komunal, z. Fadil Gashi, rektorët e universiteteve të Kosovës, hoxhë Kadri Berisha, Don Loren Sopi, menaxhmeti i UP-së, anëtarët e KD-së dhe familjar e miq të rektorit Dema.
Titulli “Nderi i Qytetit” gjatë kësaj ceremonie iu nda edhe futbollistit të kombëtares së Shqipërisë, Shkelzen Gashit.