U mbajt punëtoria dyditore për zhvillimin e aftësive profesionale: “Aftësi për Sukses në Karrierë: Lidership, Komunikim Efektiv dhe Përgatitje për Tregun e Punës”

Qendra për Zhvillim të Karrierës në Universitetin e Prishtinës, në bashkëpunim me Success Skills International (SSI), organizoi punëtorinë dyditore me temën “Aftësi për Sukses në Karrierë: Lidership, Komunikim Efektiv dhe Përgatitje për Tregun e Punës”, një aktivitet i konceptuar për të fuqizuar studentët me kompetenca thelbësore për zhvillim profesional dhe integrim të suksesshëm në tregun e punës .

Punëtoria u zhvillua më 21 dhe 22 prill 2026 dhe u ndërtua mbi një qasje bashkëkohore të të nxënit, duke ndërthurur dimensionin teorik me aplikimin praktik. Në këtë kuadër, aktiviteti adresoi nevojën në rritje për zhvillimin e aftësive të transferueshme, të cilat konsiderohen vendimtare për përgatitjen e studentëve për sfidat e mjediseve profesionale dinamike.

Gjatë zhvillimit të punëtorisë, pjesëmarrësit avancuan vetëdijen e tyre profesionale dhe reflektuan mbi mënyrën e pozicionimit në tregun e punës, duke përforcuar njëkohësisht aftësitë e komunikimit ndërpersonal dhe profesional. Ata u njohën me konceptet themelore të lidershipit dhe aplikimin e tyre në fazat e hershme të karrierës, ndërsa nëpërmjet simulimeve reale të intervistave të punës dhe situatave profesionale, zhvilluan aftësi konkrete të vetëprezantimit dhe vendimmarrjes. Në përfundim të procesit, pjesëmarrësit hartuan plane individuale për zhvillimin e tyre të mëtejshëm në karrierë.

Punëtoria u udhëhoq nga Atifete Xhemaj, trajnere me përvojë në zhvillimin e aftësive profesionale dhe përgatitjen e të rinjve për tregun e punës, e cila aplikoi një qasje dinamike dhe të orientuar drejt praktikës gjatë gjithë procesit të trajnimit. Ajo theksoi se ky aktivitet përfaqësonte një hap të rëndësishëm në fuqizimin e studentëve me aftësi të domosdoshme për tregun bashkëkohor të punës, duke nënvizuar rëndësinë e ndërlidhjes së njohurive teorike me zhvillimin e kompetencave konkrete në komunikim, lidership dhe vetëprezantim profesional.

Serafina Mazrekaj, studente në Fakultetin e Bujqësisë dhe Veterinarisë, e vlerësoi punëtorinë si një përvojë transformuese, e cila i mundësoi të kuptonte më qartë rëndësinë e vetëdijes profesionale dhe zhvillimit të aftësive të komunikimit dhe lidershipit në ndërtimin e karrierës.

“Ky trajnim ishte një përvojë transformuese për mua. Më ndihmoi të kuptoj më qartë rëndësinë e vetëdijes profesionale dhe zhvillimit të aftësive të komunikimit dhe lidershipit në ndërtimin e karrierës sime. Përmes ushtrimeve praktike dhe simulimeve reale, fitova më shumë vetëbesim dhe qartësi për hapat e mi të ardhshëm profesionalë”, theksoi Serafina Mazrekaj.

Ndërkaq, Fjolla Aliu, studente në Fakultetin e Filologjisë, theksoi se punëtoria i kishte ofruar një perspektivë të re mbi përgatitjen për tregun e punës, duke e ndihmuar të kuptonte më mirë kërkesat reale të tij dhe rëndësinë e zhvillimit të aftësive praktike.

“Trajnimi më ofroi një perspektivë të re mbi përgatitjen për tregun e punës. Më ndihmoi të kuptoj më mirë kërkesat reale të tij dhe rëndësinë e aftësive praktike, veçanërisht komunikimin efektiv dhe përgatitjen për intervista. Kjo përvojë ndikoi pozitivisht në zhvillimin tim personal dhe më motivoi të punoj më tej në ndërtimin e profilit tim profesional”, u shpreh Fjolla Aliu.

Në kuadër të aktiviteteve të punëtorisë, studentët zhvilluan edhe një produkt konkret në formën e një udhërrëfyesi të strukturuar me titull “Nga Student në Profesionist: Një Udhërrëfyes drejt Ndërtimit të Identitetit Profesional” [shkarko posterin këtu]. Ky material reflektoi në mënyrë të integruar konceptet kryesore të trajtuara gjatë trajnimit, përfshirë mendësinë profesionale, komunikimin efektiv, përgatitjen për intervista pune, sjelljen në vendin e punës dhe hapat e parë drejt zhvillimit të karrierës. Nëpërmjet këtij angazhimi, studentët arritën të përkthejnë njohuritë teorike në një produkt të prekshëm dhe të zbatueshëm, duke dëshmuar aftësinë e tyre për të reflektuar në mënyrë kritike dhe për të artikuluar kompetencat thelbësore për ndërtimin e një profili profesional konkurrues dhe të qëndrueshëm në tregun bashkëkohor të punës.

Programi i punëtorisë u zhvillua sipas një strukture progresive, e cila filloi me vetëdijen personale dhe mendësinë profesionale, vijoi me zhvillimin e aftësive të lidershipit dhe komunikimit, dhe përfundoi me përgatitjen konkrete për hyrje në tregun e punës. Metodologjia e përdorur ndërthurte ushtrime reflektuese, diskutime në grup dhe simulime rolesh, duke synuar përvetësimin e njohurive të zbatueshme drejtpërdrejt në kontekste profesionale.

Në përfundim të trajnimit, pjesëmarrësit u pajisën me certifikata pjesëmarrjeje, ndërsa aktiviteti u vlerësua si një kontribut i rëndësishëm në zhvillimin e gjithanshëm të studentëve dhe në përgatitjen e tyre për integrim të suksesshëm në tregun e punës.

Ky aktivitet u mbështet nga Success Skills International (SSI) dhe Lidhja e Bizneseve të Kosovës, duke dëshmuar rëndësinë e bashkëpunimit ndërmjet institucioneve akademike dhe sektorit profesional në avancimin e aftësive të të rinjve.