Shumë objektiva të arritura paraqiten në prezantimin e progresit të Planit Strategjik të UP-së

Administrator Administrator 13 qershor 2017 Arkivuar

Në dhjetor të vitit 2016, Universiteti i Prishtinës “Hasan Prishtina” ka kompletuar dhe lansuar Planin Strategjik tre vjeçar, të quajtur udhëzuesi drejt së ardhmes. Ndërkaq, dje në Sallën e Senatit të Universitetit të Prishtinës, në praninë partnerëve kryesor të UP-së dhe stafit të lartë menaxherial, Rektori i UP-së, prof. dr. Marjan Dema prezantoi këtë plan të ndarë në dy pjesë: në qëllimet e vendosura dhe në atë së çka është arritur deri me tani.

Rektori Dema para se të kalonte në prezantimin e tij, shfrytëzoi rastin t’i përshëndeste të gjithë bashkëpunëtorët e UP-së për kooperimin e frytshëm që e kanë pasur deri me tani, duke theksuar që ky bashkëpunim ka influencuar me të madhe në arritjen e këtyre objektivave.

“Unë çdo herë them “pa e ndryshuar Universitetin e Prishtinës, është e pamundur të ndryshohet gjendja e shoqërisë në Kosovë”. Kjo është ajo që po bëjmë. Andaj, ju falënderoj për ndihmën që po na jepni në arritjen e këtyre ndryshimeve në të mirë të UP-së dhe vendit tonë” theksoi Dema.

Disa nga objektivat e arritura të paraqitura në këtë prezantim ishin: krijimi i zyrave dhe qendrave të ndryshme në kuadër të UP-së, si: Qendra për Përsosmëri në Mësimdhënie dhe Zyra për Kërkime dhe Programe të Sponsorizuara, ofrimi i bursave dhe trajnimeve për studentë dhe staf, lansimi i portalit për shërbime të karrierës, lansimi i programeve të para të marrjes së diplomës në gjuhën angleze, ngritja e numrit të studentëve ndërkombëtar pjesëmarrës në UVP, zbatimi i standardeve të avancimit dhe promovimit, përmirësimi i kurrikules së vetëvlerësimit, ridizajnimi i uebfaqës së UP-së, zhvillim infrastrukturor e shumë të arritura të tjera.

Të pranishmeve iu drejtua edhe Egzon Bajrami, i diplomuar në Fakultetin e Bujqësisë dhe Veterinarisë në UP, aktualisht asistent vullnetar në këtë institucion, si dhe i shpërblyer me çmimin Vullnetari i Vitit nga USAID-i. Në fjalimin e tij “Një e ardhme e ndritur për Universitetin e Prishtinës” ai u shpreh i lumtur për pjesëmarrjen e tij në këtë event të rëndësishëm të UP-së.

Plani Strategjik i UP-së ka tetë fusha strategjike:

  1. Mësimdhënia, kërkimi dhe shërbimi;
  2. Akreditimi dhe kontrollimi i cilësisë;
  3. Nivelet/programet e kërkuara nga tregu;
  4. Zhvillimi i burimeve njerëzore;
  5. Zhvillimi i sistemit;
  6. Llogaridhënia fiskale dhe përmirësimi i informacionit financiar të të dhënave;
  7. Zhvillimi i infrastrukturës;
  8. Globalizimi/ndërkombëtarizimi;

në arritjen e të cilave, menaxhmenti i UP-së është shumë i përkushtuar.