Shpallen konkurset për bursa të nivelit master dhe për programin njëvjeçar të Fakultetit të Arteve
Universiteti i Prishtinës shpalli konkursin për bursa të studimeve master për vitin akademik 2025/’26. Gjithashtu u hap edhe thirrja për bursat e këtij niveli të studimeve në programin njëvjeçar të Fakultetit të Arteve për vitin akademik 2024/’25.
Sipas konkursit, kandidatët që kanë të drejtë të aplikojnë për bursat master të këtij viti akademik, duhet të jenë studentë të rregullt të programeve dyvjeçare të regjistruar në vitin 2024/’25, të mos kenë ndonjë vit të përsëritur, t’i kenë kaluar të gjitha provimet e parapara në afatin e shtatorit të vitit akademik 2024/’25, ta kenë të regjistruar semestrin dimëror të vitit akademik 2025/’26 dhe të kenë notën mesatare jo më të ulët se 9.
Edhe studentët që kandidojnë për bursat e vitit të kaluar akademik në programin njëvjeçar të masterit në Fakultetin e Arteve, duhet të jenë të rregullt, të mos kenë vit të përsëritur të studimeve, t’i kenë të dhëna të gjitha provimet në afatin e shtatorit të vitit akademik 2024/’25, t’i kenë të regjistruar dy semestrat e vitit të kaluar dhe të mos kenë notën mesatare më të ulët se 9.
Bursa për studimet master të vitit akademik 2025/’26 dhe për programin njëvjeçar të Fakultetit të Arteve ka vlerën 700 euro.
Aplikimi për këto bursa bëhet nëpërmjet vegëzës sems.uni-pr.edu, duke filluar prej orës 10:00 të ditës së sotme (e premte, 21 nëntor 2025). Dy konkurset janë të hapura deri më 26 nëntor 2025 në orën 16:00.
Detajet e konkurseve dhe dokumentet që nevojiten për aplikim, mund t’i gjeni në këto vegëza:
Konkursi për bursa në studimet master të vitit akademik 2025/’26
Universiteti i Prishtinës, më i madhi, më i vjetri dhe më i suksesshmi institucion i arsimit të lartë në Kosovë dhe i rendituri më së larti në platformat prestigjioze ndërkombëtare nga të gjitha universitetet në gjuhën shqipe në Ballkanin Perëndimor dhe botë, duke vepruar në vazhdimësi me transparencë e meritokraci, i pret me kënaqësi aplikimet për këto bursa.