Prorektori Avdiaj, së bashku me profesorin dhe asistenten nga UP-FIM, pjesëmarrës në International Training Week në University of Applied Sciences, në Nysa të Polonisë

Prorektori për kërkime, projekte, inovacion dhe informacion, Sefer Avdiaj, së bashku me Profesorin Prof. Ass. Drilon Meha dhe Asistentën e FIM, Ass. Dr. Sc. Bukurije Hoxha kanë marrë pjesë në International Staff Training Week, në Nysa të Polonisë. Gjatë kësaj kohe përveç trajnimit dhe certifikimit të tyre për organizim projektesh, personeli i UP-së gjithashtu ka mbajtur ligjërata para studentëve ndërkombëtarë me tematikat përkatëse të fushave që ata i mbulojnë.

Prorektori është takuar edhe me rektorin e University of Applied Sciences të Nysas Prof. Dr. Przemysław Malinowski me të cilin janë dakorduar për thellimin e bashkëpunimeve të mëtejshme me interes të ndërsjellë, me qëllim të avancimit të mëtejshëm të Universitetit të Prishtinës.

Përgjatë kësaj vizite, delegacioni nga UP-ja ka pasur rastin të takohet dhe të bisedojë me personalitete të shquara të fushave të ndryshme nga e gjithë bota, duke shkëmbyer mendime dhe përvoja të vlefshme.

Kjo vizitë ka hapur rrugë për bashkëpunime të reja dhe projekte të përbashkëta në sektorin e shkëmbimit të studentëve përgjatë semestrave si dhe projekte të tjera në fushën e edukimit.

Vizita e prorektorit Avdiaj dhe stafit të Universitetit të Prishtinës u mundësua nga programi Erasmus +, i cili mbështet qëllimet e shkëmbimit të njohurive dhe praktikave më të mira rreth bashkëpunimit në kuadër të programit si dhe inkurajimin e institucioneve të tjera partnere, studentët e programi Erasmus+ në Universitetin e Shkencave të Aplikuara- UAS në Nysa dhe studentët polakë për t'u regjistruar në programe në universitetet partnere të përfaqësuara në Javën Ndërkombëtare të Trajnimit të Stafit - ISTW.