Profesori Gunther i dhuron UP-së bibliotekën e tij prej 10.000 librash

“Kam përsëritur vullnetin tim që pas vdekjes sime t’ia dorëzoj Universitetit të Prishtinës bibliotekën time private”, ka thënë Gunther në një takim me rektorin e UP-së, prof. dr. Marjan Dema.

Kontributin e tij për UP-në, të nisur në vitin 2006, profesori Gunther po e vazhdon me dhurimin e kësaj biblioteke në formë të testamentit. (Kliko KËTU për testamentin)
“Mendoj se dhurimi i bibliotekës sime është një investim i mirë. Të gjitha universitetet e vjetra kanë biblioteka të mëdha dhe UP-ja duhet ta posedojë një të tillë”, ka thënë ai.

Librat e dhuruar janë në gjuhë të ndryshme të botës: anglisht, gjermanisht, shqip, arabisht, rusisht e gjuhë të tjera. Edhe përmbajtja e tyre është e larmishme. Ato i takojnë fushës së letërsisë, teknologjisë e komunikacionit, nga të cilat studentët do të përfitojnë njohuri të shumta. E nga kjo mori librash, e preferuara e profesorit është “Utopia” e autorit Thomas More.

Teksa rrëfen për mbresat që i ka lënë UP-ja, ai thotë se “zemra ime është pjesërisht atje.”

Profesor Gunther rrugëtimin për kontributin në Kosovë e nisi në vitin 2006, kur u kontaktua nga dr. Erhard Busek, me kërkesën që të kontribuojë si një ekspert i arsimit të lartë në Kosovë. Gunther mundësoi që 30 asistentë të UP-së të shkonin për studime PhD në Austri. Ai trajnoi personelin akademik të UP-së, duke ndihmuar kështu rritjen e cilësisë së arsimit të lartë publik në Kosovë. Listës së kontributeve të profesorit Gunther i shtohen edhe trajnimet, seminaret dhe punëtoritë e organizuara për profesorët dhe studentët tanë.

Ndonëse kaq shumë i dha universitetit dhe Kosovës, ai, pas katër vjetësh qëndrim, nuk u kthye duarbosh. Ai thotë se Kosova ia bëri të mundur të njohë miq të mirë dhe të shijojë ushqim të mrekullueshëm. E për studentët e UP-së, ai ka një porosi: “Njohuria është gjëja më e rëndësishme për brezat e rinj dhe kjo nuk fitohet vetëm në universitet apo në shkolla por gjendet edhe në libra tradicionalë e elektronikë”, ka thënë ai.

Për kontributin e dhënë ndër vite për UP-në si dhe për bibliotekën e dhuruar, Universiteti i Prishtinës i është mirënjohës profesorit Gunther.
“Kontributi i tij është i pashoq. Ai bën pjesë në listën e miqve më të mirë të universitetit dhe vendit tonë, për çka ne do t’i jemi falënderues përherë,” tha rektori Dema.

Aktualisht, profesori Gunther, në bashkëpunim me UP-në, është duke organizuar edicionin e 17-të të Konferencës Ndërkombëtare Shkencore NETTIES, e cila ka për qëllim promovimin e inovacionit dhe teknologjisë për zhvillimin e vendit.