Studentët e UP-së, të suksesshëm në Garën Ndërkombëtare të së Drejtës Humanitare në Slloveni
Nesa Këpuska, Adenit Hoti dhe Ilir Hajraj kanë përfaqësuar Fakultetin Juridik të Universitetit të Prishtinës “Hasan Prishtina” në Garën Ndërkombëtare të së Drejtës Humanitare, e cila u mbajt nga 20 deri më 24 nëntor 2019 në Lubjanë të Sllovenisë.
Kjo garë trajtonte rastet të cilat adresojnë çështje sa i përket të drejtës ndërkombëtare humanitare dhe asaj të refugjatëve, me ç’rast studentët tanë, në mesin e studentëve nga 19 universitete të Evropës, treguan sukses gjatë gjithë garës, përmes shqyrtimit profesional dhe aftësisë së argumentimit të çështjeve të diskutuara.
Përvojën e përjetuar në këtë garë, Nesa e konsideron të jashtëzakonshme.
“Përveç faktit që kemi njohur studentë nga universitete të tjera dhe kemi shkëmbyer mes vete njohuri, qoftë në fushën e drejtësisë, qoftë në aspektin kulturor të vendit tonë, kemi arritur që të mësojmë për rëndësinë që ka e drejta ndërkombëtare humanitare dhe kjo ka ngjallur interesimin për të studiuar këtë lami në të ardhmen, që edhe ka qenë një nga qëllimet e kësaj gare”, tha ajo.
Mbështetje të parezervë studentëve pjesëmarrës u ka dhënë prof. asoc. dr. Iliriana Islami, e cila u ka ndihmuar në krijimin e hapësirës për pjesëmarrje në gara ndërkombëtare.
UP-ja për herë të dytë po merr pjesë në Garën Ndërkombëtare të së Drejtës Humanitare, e cila organizohet nga Fakulteti Juridik i Universitetit të Lubjanës, në bashkëpunim me International Committeeof the Red Cross, United Nation High Commissioner for Refugees dhe Slovenian Red Cross.